dabara

1) Bir wakanyň şanyna geçirilýän uly baýram, tomaşa, şadyýanlyk, şowhun.

2) Joşgunly ruhubelentlik, göçgünlilik.

∙ Ol şol geýimleri geýnip, dabara bilen klasa girdi. (A. Gowşudow, Mähri-Wepa)

∙ Ýüzünde dabara, şatlyk duýulmaýardy. (G. Kulyýew, Köpetdagyň Aňyrsynda)

3) Üstünlik, ýeňiş, at-abraý, at, taryp, şöhrat.

∙ Dabarasy bütin äleme doldy, Batyrlar döreýär biziň ýerlerde. (Nury Annagylyç, Saýlanan eserler)

∙ Asuda ýurdumda her ýan baksam-da, Dabarasy joşup, asmana galýar. (K. Işanow, Watan Üçin)

◊ dabara düşmek — Hemmeleri geň galdyrýan habar ýaýramak.

∙ Bir kiçijik oglan şeýle bir uly iş bitiripdir -- diýip, il içine dabara düşdi. (A. Gowşudow, Mähri-Wepa)

◊ dabarasy dag aşmak — Köp ýere ady ýaýramak, ady äleme dolmak.

∙ Ol gün onuň dabarasy dag aşýardy. («Sowet edebiýaty» žurnaly)

∙ Gel, söýgülim, toý edeli, Dabarasy daglar aşsyn. (G. Muhtarow, G. Seýitliýew, Bagbanyň Gyzy)